1. 介紹
近排，你可能經常喺網上見到一個潮語：「Gaslighting」——中文叫做「煤氣燈效應」。究竟 Gaslighting 係乜嘢？點解呢個詞突然咁紅？
其實，Gaslighting 嘅起源係1938年英國嘅一套舞台劇《Gas Light》，之後喺1944年，仲拍咗同名電影。故事大概係講一個丈夫，透過操控同扭曲現實，慢慢令老婆懷疑自己嘅記憶同判斷，最後甚至以為自己精神有問題。簡單嚟講，Gaslighting 就係一種心理操控手段。操控者會故意扭曲事實，令對方懷疑自己嘅記憶、感受同理智，慢慢令人失去自信，最後變得容易受控制。
2. 生活例子
舉個生活例子，你可能都經歷過：有人講咗一啲傷害你嘅說話，當你認真表達自己覺得唔舒服嘅時候，對方反而話：「吓？我冇講過喎。」或者話：「係咪你太敏感呀？」再或者會講：「你諗多咗啦。」呢種講法，唔係單純解釋，而係故意令你懷疑自己嘅感覺同記憶，呢啲就係典型嘅 Gaslighting 操作。
3. Gaslighting 的影響
Gaslighting 之所以咁有效，係因為佢直接攻擊緊你嘅自我認知同自信心。當你開始懷疑自己，你自然會更加依賴對方嘅說話，慢慢將自己擺喺被操控嘅位置。呢種操控手段，唔單止發生喺情侶之間，就連朋友、家人、甚至職場都會出現。例如，有啲上司明明俾咗指示叫你去做某啲事，之後卻話自己冇講過，仲會話：「係咪你記性有問題？」結果，員工唔單止唔敢出聲，仲會開始懷疑自己嘅能力。
4. Gaslighting 應對方法
第一，相信自己嘅感覺同經驗。如果你覺得唔舒服，唔需要即刻否定自己。當你懷疑對方成日 Gaslighting 你嘅時候，你可以用筆記記低當時嘅對話，只要你有記錄喺手，就可以幫自己保持頭腦清醒。
第二，保持自己嘅社交圈子，唔好困住自己。Gaslighter 往往會試圖孤立你，令你少咗第三方意見，咁你先至會更加容易受控制。所以，要有意識咁同朋友、家人保持聯絡，有疑問嘅時候，記得要搵信得過嘅人傾吓。
第三，必要時尋求專業幫助。如果你發現自己情緒長期焦慮、抑鬱，你唔使覺得羞恥，搵輔導員或者心理治療師，佢哋都可以幫你重建自信同判斷力，帶你走出操控循環。
8. 總結
Gaslighting 呢個詞之所以近年咁紅，係因為好多人先至意識到，原來自己長期處於一種被操控嘅狀態，以前唔識形容，而家終於有個詞，可以講得清清楚楚。以後再遇到人 Gaslighting 你嘅時候，你就要學識保持頭腦清醒啦！